План мерапрыемстваў па папулярызацыі і пашырэнні сферы выкарыстання беларускай мовы

План мерапрыемстваў па папулярызацыі і пашырэнні сферы выкарыстання беларускай мовы ва ўстанове адукацыі “Магілеўская дзяржаўная гімназія-каледж мастацтваў”
на 2019/2020 навучальны год    (паглядзець тут)

Інтэрактыўная гульня “Сцяжынкамі Беларусі”

02.04.2020

Беларусь невыпадкова называюць зямлёю пад белымі крыламі. Наш родны край – чароўны і старажытны,  як сівая легенда. Гэта краіна таленавітых і працавітых людзей, продкі якіх славіліся мужнасцю, жыццёвай мудрасцю і сілай духу. Ведаць традыцыі, святы, славутых людзей павінен кожны беларус. З такой мэтай 2 красавіка для груп 1, 2 і 3 курсаў была праведзена інтэрактыўная гульня “Сцяжынкамі Беларусі”. Вучні знаёміліся з роднай краінай, яе культурай, гісторыяй, прыродай. Гульня  складалася з  наступных катэгорый : "Самыя-самыя", "Суайчыннікі", "Святы", "Стравы","Строі",  кожная з якіх уключала па 5 пытанняў адной тэматыкі. Цікава было даведацца пра самую высокую кропку Беларусі, самы старажытны горад, а таксама пра самую маленькую птушачку нашага краю. Іван Фёдараў, Пётр Мсціславец, Ігнат Дамейка – землякі, якімі мы ганарымся. Каляды, Купалле, Вялікдзень – святы, якія мы і сёння шануем. Актыўна вучні адказвалі на пытанні, якія датычыліся беларускіх нацыянальных страў. Пераможцамі сталі ўсе ўдзельнікі, таму што па заканчэнні гульні ва ўсіх быў добры настрой і задавальненне ад працы.

 Настатаўнік беларускай мовы і літаратуры Дабравольская І.В.

“Моўныя скарбы роднага краю”

27.03.2020

26 сакавіка вучні 2В класа адправіліся ў займальнае падарожжа па неабсяжнай краіне Мовазнавіі, уладаркай якой з’ўляецца спадарыня Мова. Віктарына “Моўныя скарбы роднага краю” пачалася з разгадвання крыжаванкі “Мова продкаў маіх”. Весела прайшло спаборніцтва “Гэтыя цікавыя загадкі”. Дзеці праявілі кемлівасць і ўспомнілі прымаўкі, прачыталі вершы пра Беларусь і родную мову! У час музычнай паўзы ўсе спявалі беларускія песні. Было цікава і весела, а самае каштоўнае тое, што гучала беларускае слова  з вуснаў падрастаючага пакалення.

Э.Д.Аўтушэнка, выхавальнік  ГПД

Вусны часопiс "Слухайце ўсе!"

13.03.2020

12 сакавiка ў 3Б класе прайшоў вусны часопiс "Слухайце ўсе!". Вучнi пазнаёмiлiся з гiсторыяй узнiкнення народных вясеннiх святаў "Сарокi", "Герасiм-грачэўнiк", успомнiлi асноўныя прыкметы вясны, чыталi вясеннiя заклiчкi, вершы, адгадвалi загадкi, гулялi ў гульнi. У канцы мерапрыемства вучнi праслухалi гуказапiс спеваў птушак.

Настаўнік Платонава І.А.

Гульня «Мая Радзiма – Беларусь»

28.02.2020

27 лютага ў 2 «Б» класе адбылася інтэрактыўная гульня «Мая Радзiма – Беларусь». Вучнi пазнаёміліся з гiсторыяй сваёй Радзiмы, з яе прыроднымі багаццямі, з беларускімі вырабамі прыкладнога мастацтва. У выкананні другакласнікаў гучалі народныя песнi i вершы на роднай мове пра Беларусь.

Выхавальнiк ГПД Гарэлiкава С.Т.

Тыдзень беларускай мовы і літаратуры

26.02.2020

З 17 па 21 лютага ў гімназіі-каледжы быў праведзены тыдзень беларускай мовы “З любоўю да роднага слова”. На працягу тыдня праводзіліся мерапрыемствы, прысвечаныя папулярызацыі беларускай мовы і літаратуры. Так, у 8-х класах прайшла віктарына “Пазнай героя па апісанні”, дзе вучні мелі магчымасць успомніць творы, якія вывучалі ў ранейшых класах. У 7-х класах прайшоў урок-інсцэніроўка па творы З. Бядулі “На Каляды к сыну”. Таксама 7-я класы наведалі Магілёўскую абласную бібліятэку імя Леніна, дзе прынялі ўдзел у інтэрактыўнай гульні-квэсце “Беларускі нацыянальны касцюм”. Адкрыты ўрок-суд па творы К.Чорнага “Насцечка” прайшоў у 6-х класах. Нетрадыцыйная форма ўрока вельмі спадабалася шасцікласнікам. Інтэрактыўная віктарына “Падарожжа па Мовазнавіі”прайшла ў 5-х класах. У беларускі чацвер усе жадаючыя сталі ўдзельнікамі конкурсу “Буслік – 2020”.  Завяршыла тыдзень абрадавае мерапрыемства “Гуканне вясны”, дзе навучэнцы 2 курса знаёмілі вучняў 5, 6 класаў з вясновым нацыянальным абрадам, дарылі птушачак і спявалі вяснянкі. У фае 2 корпуса быў аформлены інфармацыйны стэнд “Тыдзень беларускай мовы”, на якім была прадстаўлена інфармацыя пра А. Пысіна, нашага земляка, якому ў гэтым годзе споўнілася б 100 год з дня нараджэння.

«Дружба пачынаецца з усмешкі»

14.02.2020

13 лютага, у беларускамоўны чацвер, у пачатковых класах прайшло мерапрыемства «Дружба пачынаецца з усмешкі». Вучні збіралі беларускія прыказкі пра дружбу і сяброў, разважалі пра тое, якімі якасцямі павінен валодаць сапраўдны сябар, з пялёсткаў складалі кветку «Законы сяброў». Вызначылі, што толькі той, хто ўмее суперажываць, браць рэштку цяжкасцей на сябе, знаходзіцца побач і ў горы, і ў радасці, называецца сапраўдным сябрам. У канцы сустрэчы дзеці абмяняліся  ўсмешкамі і добрымі словамі са сваімі сябрамі.

Настаўнік пачатковых класаў Яўсеева Т.А.

Віктарына “Смак беларускай мовы”

06.02.2020

6 лютага ў 5-8 класах настаўнікі беларускай мовы правялі віктарыну “Смак беларускай мовы”. Вучні змаглі завочна пабываць ва ўсіх кутках Беларусі, ва ўсіх абласных гарадах роднага краю. Каб атрымаць звесткі, цікавую інфармацыю пра тую ці іншую вобласць, трэба было выканаць заданні па арфаграфіі.

Настаўнік беларускай мовы і літаратуры Дабравольская І.В.

Вусны часопіс “Беларускія казкі”

31.01.2020

30 студзеня ў 2А класе адбылося мерапрыемства "Беларускія казкі". З вялікім задавальненнем дзеці размаўлялі па-беларуску, успаміналі беларускія казкі і іх герояў, адказвалі на пытанні, адгадвалі загадкі, па-сяброўску працавалі ў камандах. А напрыканцы мерапрыемства дзеці паказалі інсцэніроўку беларускай народнай казкі "Пшанічны каласок". Было цікава і пазнавальна.

Выхавальнік ГПД Кузьміна Р.У.

Інтэлектуальна-пазнавальная гульня “Ці ведаю я Беларусь?”

23.01.2020

Мэтай гульні было вывучэнне гісторыка-культурнай спадчыны роднай краіны і яе дасягненняў, фарміраванне паважлівых адносін да сваёй Айчыны, выхаванне пачуцця гонару і глыбокай павагі да нацыянальных традыцый , звычаяў, культуры. Кожны вучань у канцы ўрока мог сказаць: “Я ведаю і ганаруся сваёй Бацькаўшчынай!”.

Настаўнік беларускай мовы і літаратуры Дабравольская І.В.