Класы з беларускай мовай навучання

Упраўленне па адукацыі Магілёўскага гарвыканкама даводзіць да ведама, што ў 2021/2022 навучальным годзе будзе ісці набор у першы клас з беларускай мовай навучання на базе дзяржаўнай установы адукацыі “Сярэдняя школа № 1 г. Магілёва”. Акрамя таго, працягнуць працаваць II, IV і VI класы з беларускай мовай навучання на базе дзяржаўнай установы адукацыі “Сярэдняя школа № 34 г. Магілёва”, III і V класы з беларускай мовай навучання на базе дзяржаўнай установы адукацыі “Сярэдняя школа № 1 г. Магілёва”.

Па пытаннях навучання дзяцей у гэтых класах звяртацца па тэл.:
24 95 75, 24 18 64, 24 43 66 (сярэдняя школа № 1 г. Магілёва, вул. Першамайская, 24);
24 52 29, 24 50 15, 24 52 48 (сярэдняя школа № 34 г. Магілёва, вул. Габраўская, 16).

Запрашаем усіх жадаючых у беларускамоўныя класы.

03.09.2020

ПЛАН мерапрыемстваў установы адукацыі
“Магілёўская дзяржаўная гімназія-каледж мастацтваў імя Яўгенія Глебава”
па папулярызацыі і пашырэнні сферы выкарыстання беларускай мовы
на 2020/2021навучальны год

"Знаёмства з беларускім нацыянальным касцюмам"

07.05.2021

6 мая ў 1Б класе прайшоў занятак "Знаёмства з беларускім нацыянальным касцюмам". На занятку дзеці даведаліся аб асаблівасцях беларускага нацыянальнага касцюма, даведаліся пра назвы мужчынскага і жаночага аддзення, разгадвалі загадкі. Хлопчыкам і дзяўчынкам вельмі спадабалася гульня "Перакладчыкі". Яны з цікавасцю суадносілі рускія і беларускія назвы адзення, а таксама перакладалі словы з адной мовы на другую. У канцы занятка дзеці з вялікім задавальненнем расфарбавалі малюнкі з беларускімі нацыянальнымі касцюмамі. 

Падарожжа "Мой город Магiлёў"

У групе падоўжанага дня прайшло мерапрыемства  "Мой город Магiлёў". На занятку дзецi даведалiся, адкуль пайшла назва города Магiлёва. Навучэнцы расказвалі пра прыгожыя мясцiны, якiя ёсць у нашым горадзе. У заключэннi размовы прайшоў конкурс малюнкаў "Мой горад Магiлёў".

Занятак «Жывёльны свет Беларусі»

16.04.2021

Роднае слова – гэта першая крыніца, праз якую мы пазнаём жыцце і навакольны свет. 15 красавіка ў 1А класе прайшоў занятак «Жывёльны свет Беларусі». Дзеці спаборнічалі ў адгадванні загадак, пашыралі свае веды пра дзікіх жывел. Хлопчыкам і дзяўчынкам трэба было па апісанні даведацца, што за жывёла, скончыць выказванні, знайсці лішнюю жывёлу, паразважаць, "што будзе, калі...". У канцы занятку дзеці разбіліся на групы па інтарэсах, малявалі жывёл, якія ім спадабаліся, і складалі невялікае апавяданне пра іх. Занятак прайшоў цікава і займальна.

Інтэрактыўная гульня-віктарына “Сцяжынкамі Беларусі”

09.04.2021

Дзеці амаль што ўсіх класаў любяць інтэрактыўныя гульні. Таму праводзяцца гульні “Сцяжынкамі Беларусі”, “Ці ведаю я Беларусь?”, “Сакрэты беларускай мовы”. У ходзе заняткаў вучні знаёмяцца з роднай краінай, яе культурай, гісторыяй, прыродай. 8 красавіка ў 7-х класах прайшла гульня “Сцяжынкамі Беларусі”, якая складаецца з наступных катэгорый : "Самыя-самыя", "Суайчыннікі", "Святы", "Стравы", "Строі", кожная з якіх уключала па 5 пытанняў адной тэматыкі. Цікава было даведацца пра самую высокую кропку Беларусі, самы старажытны горад, а таксама пра самую маленькую птушачку нашага краю. Іван Фёдараў, Пётр Мсціславец, Ігнат Дамейка – землякі, якімі мы ганарымся. Каляды, Купалле, Вялікдзень – святы, якія мы і сёння шануем. Актыўна вучні адказваюць на пытанні, якія датычыліся беларускіх нацыянальных страў. Добры настрой, пашырэнне кругагляду і задавальненне ад працы напрыканцы заняткаў забяспечаны ўсім удзельнікам.

Настаўнік беларускай мовы і літаратуры Дабравольская І.В.

Вынікі гарадской алімпіяды па вучэбнаму прадмету “Беларуская мова і літаратура”

02.04.2021

1 красавіка 2021 года прайшла гарадская алімпіяда па прадмету “Беларуская мова і літаратура”. Вучні гімназіі-каледжа  атрымалі 6 дыпломаў:

Кундзерава Карына (4 клас) - дыплом 2 ступені (настаўнік Яўсеева Т.А.)
Паўлоўскі Антон (5 клас) - дыплом 3 ступені (настаўнік Дабравольская І.В.)
Раманава Святаслава (5 клас) - дыплом 3 ступені (настаўнік Дабравольская І.В.)
Казлова Ганна (6 клас) - дыплом 3 ступені (настаўнік Скрыпка І.А.)
Грабеннікава Лізавета (6 клас) - дыплом 2 ступені (настаўнік Скрыпка І.А.)
Пліндова Ганна (8 клас) - дыплом 3 ступені (настаўнік Скрыпка І.А.)

Кіраўніцтва гімназіі-каледжа і педагагічны калектыў дзякуе ўдзельнікам алімпіяды і віншуе з перамогай педагогаў і вучняў!

“Ні дня без радка”. 125 гадоў споўнілася са дня нараджэння Кандрата Крапівы

26.03.2021

5 сакавіка беларускаму пісьменніку, паэту, сатырыку, драматургу, перакладчыку, грамадскаму дзеячу, літаратуразнаўцу Кандрату Крапіве споўнілася б 125 гадоў. Вострай мовай сатыры ён распавядаў праўду аб людскіх характарах, а сакавітасць беларускай мовы ўвекавечыў у знакамітых слоўніках. Ён перажыў усе ўзрушэнні ХХ стагоддзя: рэвалюцыю і дзве сусветныя вайны. Яшчэ пры жыцці прызнаны класік, Крапіва ўнесены ў школьныя праграмы, увекавечаны ў тэатральных пастаноўках і тэлеэкранізацыях. Вучні 9 “А” класа да дня нараджэння пісьменніка стварылі электронную газету “Кандрат Крапіва. Галерэя сатырычных вобразаў”, у ёй змешчаны ілюстрацыі да баек , а таксама цытаты з твораў, якія сёння сталі афарызмамі.

Дабравольская І.В., настаўнік беларускай мовы і літаратуры

Вусны часопіс “Кандрат Крапіва – байкапісец”

19.03.2021

18 сакавіка ў 4Б класе адбыўся вусны часопіс "Кандрат Крапіва – байкапісец", прысвечаны 125-годдзю з дня нараджэння вядомага беларускага пісьменніка. Вучні пазнаёміліся з біяграфіяй і творчасцю Кандрата Крапівы (Атраховіча Кандрата Кандратавіча). Хлопчыкі і дзяўчынкі з задавальненнем чыталі байкі “Дыпламаваны баран”, “Ганарысты парсюк”, “Вол і Авадзень”. Дзеці інсцэніравалі байку "Дзед і баба". Вучні зразумелі, што творы Кандрата Крапівы не страцілі сваёй актуальнасці і ў наш час. Сустрэча атрымалася цікавай і пазнавальнай.

А.Атрошчанка, выхавальнік ГПД

Семінар настаўнікаў беларускай мовы і літаратуры

12.03.2021

Сто гадоў шукаў другой красы,
А тым больш, што свет зусім не вузкі.
Ды, калі ты не бязродны сын,
Гавары са мной па-беларуску.

 Яўгенія Янішчыц

11 сакавіка 2021 года на базе ўстановы адукацыі “Магілёўская дзяржаўная гімназія-каледж мастацтваў імя Яўгенія Глебава” з удзелам дзяржаўнай установы адукацыі “Сярэдняя школа №9 г.Магілёва” прайшло пасяджэнне пастаяннага семінара настаўнікаў беларускай мовы і літаратуры горада Магілёва. Тэма пасяджэння: “Падтрымка і пашырэнне сферы выкарыстання беларускай мовы ва ўстанове агульнай сярэдняй адукацыі: з вопыту работы па правядзенні адзіных дзён беларускага маўлення”.

Настаўнікі гімназіі-каледжа і сярэдняй школы №9 пазнаёмілі прысутных са сваімі набыткамі па папулярызацыі беларускай мовы, падтрымцы нацыянальных традыцый і народнай спадчыны, расказалі пра сістэму работы ў гэтым накірунку. Семінар пачаўся экскурсіяй у музей гімназіі-каледжа, дзе навучэнкі ІІІ курса пазнаёмілі гасцей са 100-гадовай гісторыяй навучальнай установы, цікавымі звесткамі пра славутых выпускнікоў і выкладчыкаў, багатай спадчынай, якую пакінулі нам былыя пакаленні і якую навучэнцы гімназіі-каледжа працягваюць назапашваць сваімі шматлікімі дасягненнямі і высокімі ўзнагародамі.

Наступнай старонкай семінара быў вучэбна-метадычны блок, на якім настаўнікі беларускай мовы падзяліліся сваім вопытам работы па правядзенні адзіных дзён беларускага маўлення, па папулярызацыі роднага слова, фарміраванні ў вучняў нацыянальнай свядомасці, погляду на нацыянальную культуру як духоўную каштоўнасць народа.

У гэты Масленічны тыдзень не абышліся без пачастункаў. Сапраўдным падарункам для наведвальнікаў семінара стала гульня “Чароўны блін”, на якой дзеці спявалі песні-вяснянкі, расказвалі пра народны беларускі абрад гукання вясны, частавалі гасцей блінамі. Не абышлося і без падарункаў. Для гасцей вучнямі быў зроблены стылізаваны сувенір-сонейка як сімвал Масленіцы – традыцыйнага свята беларусаў.

Яркай, рознакаляровай, цікавай старонкай мерапрыемства стала літаратурна-музычная кампазіцыя “Малюнкі роднага краю”, у якой вучні гімназіі-каледжа расказалі пра знакамітыя мясціны і славутых жыхароў горада Магілёва. У канцэрце прагучалі як класічныя кампазіцыі беларускіх аўтараў, так і творы народнага мастацтва, а вучні харэаграфічнага аддзялення выканалі беларускі народны танец “Лявоніха”.

Разнастайныя мерапрыемствы і сістэмнасць работы па далучэнні вучняў да роднага слова і нацыянальнай культуры, выхаванні сапраўдных грамадзян, неабыякавых да лёсу сваёй краіны, патрыётаў, якія б пачалі адчуваць сябе неад’емнай часткай Бацькаўшчыны, прыносяць свае плады. Дзеці з вялікім задавальненнем прымаюць актыўны ўдзел у розных гарадскіх і абласных творчых конкурсах, не цураюцца і ахвотна вывучаюць родную мову, многія выказваюць жаданне гаварыць на ёй.

 Настаўнік беларускай мовы і літаратуры гімназіі-каледжа мастацтваў Скрыпка І.А.